रोखठोक 24 न्युज नेटवर्क / अहिल्यानगर
दिनांक 16 सप्टेंबर रोजी नेवासे तालुक्यातल्या झापवाडी शिवारात मुळा कॅनॉललगत असलेल्या शेतामध्ये अज्ञात आरोपीने अनोळखी महिला वय अंदाजे 60 वर्षे हिचा निर्घृण खून केला होता. या गुन्ह्यात अहिल्यानगर स्थानिक गुन्हे शाखेच्या पोलिसांनी महादेव आनंदा महारनवर (रा. एकेरीवाडी, पो. देलवडी, ता. दौंड, जि. पुणे) याला नुकतीच अटक केली. सखोल चौकशी केली असता हा गुन्हा केल्याची कबुली त्यानं पोलिसांना दिली.
सदर घटनेबाबत पोलीस उपनिरीक्षक सुरज पांडूरंग मेढे, (नेमणूक सोनई पोलीस स्टेशन) यांनी दिलेल्या फिर्यादीवरुन सोनई पोलीस स्टेवनमध्ये (गु.र.नं. 387/2024 बीएनएस कलम 103 (1) प्रमाणे खुनाचा गुन्हा दाखल करण्यात आला होता.
सदरची घटना घडल्यानंतर अहिल्यानगरचे जिल्हा पोलीस अधीक्षक राकेश ओला
यांनी पोलीस निरीक्षक दिनेश आहेर, स्थानिक गुन्हे शाखा
यांना सदर ना उघड खुनाचे गंभीर गुन्ह्याचा समांतर तपास करुन गुन्हा उघडकीस आणणे बाबत आदेशित केले होते.
सदरची घटना घडल्यानंतर पोलीस निरीक्षक आहेर यांनी घटनास्थळी भेट देऊन स्थानिक गुन्हे शाखेतील सपोनि/हेमंत थोरात, पोलीस अंमलदार ज्ञानेश्वर शिंदे, संदीप दरंदले, सोमनाथ झांबरे, फुरकान शेख, किशोर शिरसाठ, प्रशांत राठोड, संतोष खैरे, महादेव भांड अशांचे पथक नेमून नमूद गुन्ह्याचा तपास करुन गुन्हा उघडकीस आणण्याबाबत आवश्यक सुचना देवुन पथकास रवाना केलं.
या पथकाने घटना ठिकाणच्या परिसरात सोनई, घोडेगाव, शनिशिंगणापूर परिसरातील सीसीटीव्ही फुटेजची माहिती घेऊन, जिल्हयातील मिसिंग महिलेबाबत माहिती घेत अनोळखी मयत महिलेचे फोटो सोशल मिडिया व गुप्त बातमीदारास प्रसारित केले होते. यावरुन तपास पथकाने मयत अनोळखी महिला जिजाबाई भाऊसाहेब रुपनवर (वय 70, रा. एकेरीवाडी, पो. देलवडी, ता. दौंड, जि. पुणे) ही असल्याचं निष्पन्न केलं.
तपास पथकानं गुन्हयांच्या तपासामध्ये कोणताही पुरावा नसताना, मयत महिलेच्या राहत्या ठिकाणी आजुबाजूस राहणाऱ्या लोकांकडे विचारपूस केली असता आरोपी आणि मयत महिलेने आरोपीचे मोटार सायकलचा खराब झालेला बल्ब काष्टी (ता. श्रीगोंदा) येथील गॅरेजमध्ये नवीन टाकलेला असल्याची माहिती मिळाली. यावरुन तपास पथकाने काष्टी (ता. श्रीगोंदा) येथील सर्व मोटार गॅरेजमध्ये माहिती घेऊन अनोळखी मयत महिलेची ओळख पटविली.
पोलीस पथकानं काष्टी (ता. श्रीगोंदा) येथील मोटार गॅरेज, सीसीटीव्ही फुटेज व तांत्रिक विश्लेषणाच्या आधारे तपास करत असताना दिनांक 14/10/2024 रोजी सदरचा गुन्हा हा आरोपी नामे महादेव आनंदा महारनवर (रा. एकेरीवाडी, पो. देलवडी, ता. दौंड, जि. पुणे) याने सदरचा गुन्हा केला असल्याचे निष्पन्न झाले.
पोलीस पथकाने तात्काळ एकेरीवाडी ( पो. देलवडी ता. दौंड ) येथे जाऊन संशयितांचा शोध घेत असतांना 1 इसम मिळून आल्याने त्याला ताब्यात घेतले. ताब्यात घेतलेल्या संशयिताला त्याचं नाव गांव विचारलं असता त्यानं त्याचं नाव महादेव आनंदा महारनवर (वय 55, रा.एकेरीवाडी, पो.देलवडी, ता.दौंड, जि. पुणे) असे असल्याचं सांगितलं.
त्याच्याकडे वर नमूद गुन्ह्याच्या अनुषंगाने विचारपूस करता दिनांक 15/09/2024 रोजी 12.00 वा. सुमारास तो मयत महिला नामे जिजाबाई भाऊसाहेब रुपनवर हिच्यासह मोटार सायकलवरुन एकेरीवाडी येथून शनिशिंगणापूरकडे जात होते. झापवाडी शिवारात मुळा कॅनॉलजवळ मयत महिला हिने गाडी थांबवून आरोपीसह शेतामध्ये पुजा करीत असताना मयत महिला ही आरोपीवर काही तरी जादुटोणा करीत असल्याच्या संशयावरुन आरोपीने तिच्या गळयातील स्कार्पने मयत महिलेचा गळा आवळून तिला जीवे ठार मारल्याचे सांगितले.
मयत महिलेच्या गळयातील व कानातील सोन्याचे दागिने काढून नेलेले होते. गुन्ह्याच्या तपासामध्ये 56 हजार रुपये किंमतीचे 8 ग्रॅम वजनाचे सोने हस्तगत करण्यात आले.
ताब्यातील आरोपीस सोनई पोलीस स्टेशन गु.र.नं.387/2024 बीएनएस कलम 103 (1) या गुन्ह्याचे तपासकामी मुद्देमालासह सोनई पोलीस ठाणे येथे हजर करण्यात आले असुन पुढील तपास सोनई पोलीस स्टेशन करीत आहे.
सदरची कारवाई राकेश ओला, पोलीस अधीक्षक, अहिल्यानगर, वैभव कलुबर्मे, अपर पोलीस अधिक्षक, श्रीरामपूर, सुनिल पाटील, उपविभागीय पोलीस अधिकारी, शेवगाव विभाग यांचे सुचना व मार्गदर्शनाखाली स्थानिक गुन्हे शाखेचे पोलीस अधिकारी आणि अंमलदार यांनी केली.
