बाळासाहेब शेटे पाटील
रोखठोक 24 न्यूज नेटवर्क / अहमदनगर
नाशिक इथं झालेल्या भारतीय जनता पार्टीच्या मेळाव्यात केंद्रीय गृहमंत्री तथा भाजपचे ज्येष्ठ नेते अमित शहा यांनी जे मार्गदर्शन केलं, प्रबोधन केलं, त्यामुळे नेवासा भाजप कार्यकर्त्यांमध्ये नवचैतन्य संचारलं आहे. मात्र या मेळाव्यात अमित शहा यांनी केलेल्या ‘त्या’ घोषणेमुळे गुडघ्याला बाशिंग बांधून तयार असलेल्या अनेकांचा हिरमोड झालाय.
आगामी विधानसभा निवडणुकीच्या दृष्टिकोनातून सारेच राजकीय पक्ष कामाला लागले आहेत. विविध ठिकाणी राजकीय मेळावे घेऊन कार्यकर्त्यांना ‘चार्ज’ करण्याचे प्रयत्न सध्या सुरु आहेत. भाजपच्या या मेळाव्यातदेखील कार्यकर्ते ‘चार्ज’ करण्याचा भरपूर प्रयत्न केला गेला. अमित शहा यांनी या मेळाव्यात अतिशय अभ्यासपूर्ण आणि आगामी राजकीय परिस्थितीचा अंदाज घेत कार्यकर्त्यांना अनमोल असं मार्गदर्शन केलं.
आगामी विधानसभा निवडणुकीत उमेदवारी मागणाऱ्यांची संख्या प्रचंड असणार आहे. वेळप्रसंगी बंडखोरीदेखील होऊ शकते. अर्थात सर्वच राजकीय पक्षांसाठी ही एक प्रकारची मोठी डोकेदुखी ठरणार आहे. भाजपने मात्र या मेळाव्यातही ‘पार्टी विथ डिफरन्स’ हे धोरण कायम ठेवलंय. विधानसभेसाठी जे उमेदवारी मागतील, त्यांना अजिबात उमेदवारी दिली जाणार नाही. याउलट जे सर्वसामान्य आहेत, पक्षासाठी अहोरात्र झटणारे आहेत, जनतेच्या सुखदुःखात जास्तीत जास्त वेळ खर्च करत असतात, सामान्यांच्या मदतीला ताबडतोब धावून जातात, सरकारी योजनांचा लाभ सामान्य जनतेला मिळावा, यासाठी सतत प्रयत्नशील असतात अशाच कार्यकर्त्यांना आगामी विधानसभा निवडणुकीमध्ये उमेदवारी दिली जाणार असल्याचे स्पष्ट संकेत शहा यांनी या मेळाव्यात दिले.
‘त्या’ नेत्याची झाली फजिती…!
‘कार्यकर्ता काय मोठा करायचा असतो का’? खासगीत बोलताना असं बेजबाबदारपणाचं वक्तव्य करणाऱ्या नेवासा भाजपच्या एका नेत्यावर सध्या प्रचंड वाईट वेळ आल्याचं दिसत आहे. या नेत्याला उमेदवारी तर मिळणार नाहीच. पण आगामी काळात स्वतःबरोबर फिरण्यासाठी कार्यकर्तेदेखील उपलब्ध होतील की नाही, हीच मोठी शंका आहे. एका तालुकास्तरीय मेळाव्यात ‘या’ नेत्यानं असं वक्तव्य केलं असलं तरी ऐन विधानसभा निवडणुकीत ‘त्या’ वक्तव्याची ऑडिओ क्लिप व्हायरल केली जाण्याची दाट शक्यता आहे. पक्षश्रेष्ठींवर अविश्वास दाखवणाऱ्या आणि ‘भलत्याच’ नेत्याच्या इशाऱ्यावर चालणाऱ्या या नेत्याची मात्र नाशिकच्या मेळाव्यात चांगलीच फजिती झाल्याचं पाहायला मिळालं.