बाळासाहेब शेटे पाटील
रोखठोक 24 न्युज नेटवर्क / अहिल्यानगर
अहिल्यानगर शहरातल्या एका माहिती अधिकार कार्यकर्त्यानं दि. 13 सप्टेंबर 2024 रोजी अहिल्यानगर महापालिका कार्यालयात एक पत्र दिलं आहे. त्या पत्रात संबंधित माहिती अधिकार कार्यकर्त्यानं अनेक मुद्दे उपस्थित केले आहेत. संबंधित माहिती अधिकार कार्यकर्त्याला दि. १३ नोव्हेंबर रोजी माहिती मिळणं क्रमप्राप्त होतं. परंतु आज दि. २१ तारीख उलटूनदेखील सदरची माहिती मिळालेली नाही. त्यामुळे महापालिका कार्यालयात नक्की चाललंय तरी काय, असा प्रश्न उपस्थित होत आहे.
या पत्रात सर्वात महत्त्वाचा आणि मुख्य मुद्दा महापालिका प्रशासनासाठी मोठा अडचणीचा आहे. तो मुद्दा म्हणजे नगर शहरात महापालिकेनं हाती घेतलेल्या अर्धवट अवस्थेतल्या एचटीपी प्लांटवर अतिरिक्त साडेनऊ कोटी रुपयांचा जीएसटी कर ज्या नियमाच्या आधारे दिला, त्या नियमाची सविस्तर माहिती संबंधित माहिती अधिकार कार्यकर्त्यानं मागवली आहे.
संबंधित माहिती अधिकार कार्यकर्त्यानं स्वतःचं नाव प्रकाशित किंवा प्रसारित न करण्याच्या अटीवर रोखठोक 24 न्युज नेटवर्कला ही माहिती दिली आहे. भुयारी गटार योजनेसह एसटीपी प्लांटची सविस्तर माहिती या माहिती अधिकार कार्यकर्त्यानं मागवली असून या माहितीचा कालावधी 2017 ते आजतागायत असा आहे.
नगरच्या महापालिकेनं हा एसटीपी प्लांट ज्या जागेवर उभारला आहे, त्या जागेच्या सात बारा उताऱ्याच्या साक्षांकित प्रतीदेखील संबंधित माहिती अधिकार कार्यकर्त्यांनं मागविल्या आहेत. अर्थात या प्रती तलाठी कार्यालयात मिळतीलही आणि त्या मिळविण्याचा शंभर टक्के प्रयत्न संबंधित माहिती अधिकार कार्यकर्ता करणार असून या प्रकल्पावर आतापर्यंत झालेल्या खर्चाचा तपशीलदेखील मागविण्यात आला आहे.
हरित लवादानं नगर महापालिकेला केलेल्या आर्थिक दंडविषयीची सविस्तर माहिती आणि दंड भरला असल्यास त्या दंडाच्या पावतीची छायांकित प्रतसुद्धा माहिती अधिकार कार्यकर्त्यानं मागवली आहे.
मनपा कर्मचाऱ्याची बालिश उत्तरं…!
संबंधित माहिती अधिकार कार्यकर्ता ज्यावेळी अहिल्यानगर महापालिकेच्या कार्यालयात माहितीचं काय झालं, याची विचारणा करण्यासाठी गेला, साठे आडनावाच्या कर्मचाऱ्यांची उत्तरं दिली, ती ऐकल्यानंतर बालिशपणाचा कळस असल्याचं नक्की समोर येईल. हा कर्मचारी म्हणाला, ‘मी सर्दी तापाने आजारी आहे. शनिवारी रविवारी सुट्टी असली तरी मी तुमचं काम करून देतो’.
